Dauðinn er eins eðlilegur hluti af lífi okkar og fæðingin, en mörg eigum við erfitt með að ræða hann enda getur hann verið sársaukafullt umræðuefni. Með frumkvöðlaverkefninu Tré Lífsins viljum við opna umræðuna um dauðann og bjóða upp á nýja valmöguleika við lífslok.
Valfrelsi
Okkur þykir mikilvægt að fólk hafi frelsi til þess að velja hvað verður um þeirra jarðnesku leifar við andlát og viljum bjóða fólki að skrásetja söguna sína og hinstu óskir á sína persónulega síðu hjá Tré lífsins.
Virðing
Við viljum halda minningu látinna ástvina á lofti með minningasíðu á internetinu þar sem hægt er að rita skilaboð til látinna ættingja og lesa skilaboð frá öðrum sem minnast þeirra.
Umhverfisvernd
Við viljum heiðra minningu ástvina okkar á fallegan hátt og huga að umhverfinu í leiðinni. Við viljum bjóða fólki að gróðursetja tré ásamt ösku ástvina sinna sem vex upp til minningar um hinn látna. Draumur okkar er sá að trén vaxi í Minningagörðum þangað sem fjölskyldan getur farið saman og fylgst með trjánum vaxa og átt ljúfa stund saman í náttúrunni.
